Gizlilik siyasəti
Bu sənəd SMILE MMC-nin Brands’Box mobil tətbiqi (iOS və Android) və brandsbox.az saytı vasitəsilə hansı fərdi məlumatları topladığını, onlardan nə üçün istifadə etdiyini, kimlərlə paylaşdığını, necə qoruduğunu və bu məlumatlarla bağlı hansı hüquqlara malik olduğunuzu izah edir.
- Qüvvəyə minmə tarixi7 noyabr 2026
- Məlumat sahibiSMILE MMC
- ƏhatəTətbiq və brandsbox.az
Ümumi məlumat və məlumat sahibi
Brands’Box — Azərbaycandakı partnyor brendlərin endirim və xüsusi təkliflərini bir tətbiqdə toplayan xidmətdir. Xidməti və fərdi məlumatlarınızın emalını Azərbaycan Respublikasında fəaliyyət göstərən SMILE MMC («biz», «Brands’Box») həyata keçirir. Bu siyasət çərçivəsində fərdi məlumatların sahibi və operatoru SMILE MMC-dir.
Siyasət Brands’Box tətbiqinə (iOS, Android), brandsbox.az saytına, 2222 qısa nömrəsi üzrə SMS və *224# USSD xidmətinə, həmçinin partnyor bizneslərin əməkdaşları üçün partnyor hesablarına şamil olunur.
Hesab yaratmaqla və ya xidmətdən istifadə etməklə bu siyasətlə tanış olduğunuzu təsdiq edirsiniz. Siyasətlə razı deyilsinizsə, xidmətdən istifadə etməyin. Suallarınız üçün: support@brandsbox.az, +994 12 505 48 38.
Hansı məlumatları toplayırıq
Sizin təqdim etdiyiniz məlumatlar
- Telefon nömrəsi — qeydiyyat və giriş (SMS ilə təsdiq kodu), abunəlik və endirim kodları üçün. Google və ya Apple ilə daxil olduqda da telefon nömrəsinin təsdiqi tələb olunur.
- Ad və soyad (bir sahədə), cins və istəyə görə e-poçt ünvanı.
- Profil şəkli — yalnız özünüz kamera ilə çəksəniz və ya qalereyadan seçsəniz.
- Parol — istəyə görə təyin edilir və yalnız heş (hash) formasında saxlanılır.
- Tətbiqdaxili fəaliyyət: sevimli filiallarınız, filiallara verdiyiniz qiymətləndirmələr və şərhlər, götürdüyünüz promo-kodlar, bildiriş ayarlarınız.
- Müraciətləriniz — dəstək xidmətinə yazdıqlarınız və göndərdiyiniz rəylər (əlavə etdiyiniz ekran şəkilləri daxil olmaqla).
Xidmətdən istifadə zamanı avtomatik toplanan məlumatlar
- Endirim tarixçəsi: endirimin hansı filialda, nə vaxt, hansı şərtlə və necə tətbiq olunduğu — partnyor əməkdaşı QR kodunuzu və ya 4 rəqəmli kodunuzu daxil edibsə, həmin əməkdaş; endirimi özünüz təsdiqləmisinizsə, təsdiq kodu.
- Endirimin özünüz tərəfindən təsdiqi («Müştəri təsdiqi»): kassadakı Brands’Box QR kodunu skan etdikdə və ya yaxındakı filialı seçdikdə hər cəhd üçün filial, seçdiyiniz endirimlər, vaxt, filialın necə seçildiyi (QR, yaxındakı filiallar və ya filial səhifəsi), həmin andakı koordinatlarınız və onların dəqiqliyi, filiala qədər məsafə, cəhdin nəticəsi (təsdiq və ya imtinanın səbəbi), tətbiqin versiyası və IP ünvanı qeydə alınır.
- Abunəlik məlumatları: abunəliyin statusu, qoşulma kanalı, başlama və bitmə tarixləri, balansdan tutulma cəhdlərinin nəticələri və məbləğləri.
- Məkan — yalnız icazə verdiyiniz halda (ətraflı — «Məkan, kamera və digər icazələr» bölməsində).
- Cihaz məlumatları: platforma (iOS/Android), cihazın markası və modeli, tətbiqin versiyası, seçilmiş dil və push bildirişlər üçün token.
- Texniki jurnallar: serverlərimizə hər sorğuda IP ünvanı, tətbiq/brauzer identifikatoru (user-agent), sorğunun vaxtı, ünvanı və məzmunu qeydə alınır. Parol, token və təsdiq kodları kimi həssas sahələr bu jurnallarda gizlədilir.
- Göndərilən bildirişlər: sizə göndərilən push, SMS və e-poçt mesajlarının mətni, vaxtı və çatdırılma statusu.
Google və Apple ilə giriş zamanı
Google və ya Apple hesabı ilə daxil olduqda həmin xidmət bizə hesabınızın identifikatorunu, e-poçt ünvanınızı (və onun təsdiqlənib-təsdiqlənmədiyini), adınızı və Google-da profil şəklinizi ötürür. Google və ya Apple parolunuzu görmürük. Apple-ın «E-poçtu gizlət» funksiyasından istifadə etsəniz, yalnız Apple-ın yaratdığı ünvanı alırıq.
Mobil operatordan və SMS kanalından
2222 qısa nömrəsinə SMS göndərdikdə və ya *224*1# / *224*2# USSD əmrlərindən istifadə etdikdə operator bizə telefon nömrənizi və mesajın mətnini ötürür. Abunəlik bu kanalla yaradıldıqda hesabınız yalnız telefon nömrəsi ilə avtomatik açılır. Balansdan tutulmanın nəticəsini (uğurlu və ya uğursuz) ödəniş şlüzü bizə bildirir.
Əvvəllər Brands’Box-un 2222 SMS xidmətinə abunə olmusunuzsa, abunəliyinizin davam etməsi üçün telefon nömrəniz, e-poçt ünvanınız (əgər qeyd olunmuşdusa) və abunəlik tarixçəniz əvvəlki sistemdən yeni sistemə köçürülüb.
brandsbox.az saytı
Sayt analitika, reklam və ya izləmə kukilərindən istifadə etmir. Seçdiyiniz dil brauzerinizin yerli yaddaşında saxlanılır, şriftlər Google Fonts-dan yüklənir (bu zaman Google IP ünvanınızı görə bilər). Veb-server standart texniki jurnallar (IP ünvanı, sorğu, vaxt) aparır.
Toplamadığımız məlumatlar
- Bank kartı məlumatları — tətbiqdə kartla ödəniş yoxdur.
- Kontaktlarınız, mikrofon, təqvim, SMS-ləriniz və cihazdakı digər fayllar.
- Reklam identifikatorları (IDFA, Android Advertising ID). Tətbiqdə reklam, analitika və izləmə (tracking) SDK-ları yoxdur; sizi başqa şirkətlərin tətbiq və saytlarında izləmirik.
- Biometrik məlumatlar — Face ID və barmaq izi ilə giriş cihazınızın öz sistemi ilə yoxlanılır və bu məlumatlar cihazdan kənara çıxmır.
Məlumatlardan hansı məqsədlərlə istifadə edirik
- Hesab və giriş: telefon nömrənizi SMS kodu ilə təsdiqləmək, Google/Apple ilə girişi təmin etmək, sessiyanızı saxlamaq.
- Əsas xidmət: yaxınlıqdakı filialları, endirimləri və tədbirləri xəritədə və siyahıda göstərmək, şəxsi QR kodunuzu yaratmaq, partnyorun endirimi tətbiq etməsinə və ya endirimi filialda özünüzün təsdiqləməsinə imkan vermək, endirim tarixçəsini aparmaq.
- Abunəlik və ödəniş: abunəliyi aktivləşdirmək, yeniləmək və dayandırmaq, haqqı mobil operator vasitəsilə balansınızdan tutmaq, ödənişlə bağlı müraciətləri həll etmək.
- Bildirişlər: təsdiq kodları və abunəliklə bağlı xidməti mesajlar, ayarlarınıza uyğun olaraq endirim, xüsusi təklif və tədbirlər haqqında push, SMS və e-poçt göndərmək; Radar xəbərdarlıqlarını yandırmısınızsa, aktiv endirimi olan filialın yaxınlığında xəbər vermək.
- Dəstək: müraciətlərinizi cavablandırmaq və problemləri araşdırmaq.
- Təhlükəsizlik: saxta hesabların, kodların təkrar istifadəsinin, avtomatlaşdırılmış sorğuların (scraping) və icazəsiz girişin qarşısını almaq, endirimi özünüz təsdiqlədikdə filialda olduğunuzu yoxlamaq və sui-istifadəni (məsələn, filialdan kənarda təsdiq, qısa vaxtda bir-birindən uzaq filiallarda təsdiq, limitlərin aşılması) aşkarlamaq, xətaları aşkarlamaq.
- Xidmətin təkmilləşdirilməsi: partnyor şəbəkəsini və təklifləri planlaşdırmaq üçün ümumiləşdirilmiş statistikadan istifadə etmək.
- Qanuni öhdəliklər: qanunvericiliyin tələblərinə və səlahiyyətli dövlət orqanlarının qanuni sorğularına əməl etmək.
Məlumatlarınızdan reklam profilləri yaratmaq üçün istifadə etmirik və sizin barənizdə hüquqi nəticə doğuran tam avtomatlaşdırılmış qərarlar qəbul etmirik.
Endirimi özünüz təsdiqlədikdə sistem məsafəni, limitləri və şübhəli fəaliyyəti avtomatik yoxlayır: şərtlər ödənmirsə, həmin təsdiq rədd edilir, təkrarlanan pozuntularda isə bu funksiya hesabınız üçün müvəqqəti bağlana bilər. Bu, yalnız özünü təsdiq funksiyasına aiddir — partnyorun QR kodunuzu skan etməsi ilə endirim almaq imkanı qalır. Qərarla razı deyilsinizsə, support@brandsbox.az ünvanına yazın — müraciətinizi əməkdaşımız yoxlayacaq.
Hüquqi əsas və razılıq
Fərdi məlumatlarınızı Azərbaycan Respublikasının «Fərdi məlumatlar haqqında» Qanununa və digər qanunvericilik aktlarına uyğun emal edirik. Emalın əsasları:
- Razılığınız — qeydiyyat zamanı «Şərtlər və qaydalar»ı qəbul etməklə və bu siyasətlə tanış olmaqla, həmçinin məkan, kamera, foto və bildiriş icazələrini cihazınızın sistem pəncərəsində verməklə.
- Xidmətin göstərilməsi — istədiyiniz xidməti (hesab, endirim, abunəlik) təqdim etmək üçün zəruri olan emal.
- Qanuni öhdəlik — məsələn, ödənişlərlə bağlı uçot qeydlərinin saxlanılması.
- Qanuni maraq — xidmətin təhlükəsizliyini təmin etmək və sui-istifadənin qarşısını almaq.
Razılığınızı istənilən vaxt geri götürə bilərsiniz: icazələri cihazın ayarlarında söndürməklə, bildirişləri tətbiqdəki «Bildiriş ayarları» bölməsində dəyişməklə və ya hesabınızı silməklə. Bu, geri götürülmədən əvvəl aparılmış emalın qanuniliyinə təsir etmir; bəzi funksiyalar (məsələn, yaxınlıqdakı filiallar) icazə olmadan məhdud işləyə bilər.
Partnyor bizneslər hansı məlumatları görür
Partnyorlar — Brands’Box-da endirim təqdim edən şirkətlər və onların filiallarıdır. Filial əməkdaşı kassada QR kodunuzu skan etdikdə və ya 4 rəqəmli endirim kodunuzu daxil etdikdə onun tətbiqində aşağıdakılar görünür:
- adınız və profil şəkliniz;
- telefon nömrəniz (partnyor tətbiqində son rəqəmlərdən başqası gizlədilmiş formada göstərilir);
- abunəliyinizin aktiv olub-olmaması və bitmə tarixi;
- həmin filialda sizə tətbiq oluna bilən endirimlər.
Endirimi özünüz təsdiqlədikdə satıcı ekranınızdakı təsdiq kartını görür: abunəliyin aktiv olduğunu, seçdiyiniz endirimləri, filialı, təsdiq kodunu, adınızı və gizlədilmiş telefon nömrənizi.
Tətbiq olunmuş endirimlər — o cümlədən özünüz təsdiqlədikləriniz — filialın tarixçəsində (tarix, endirim, adınız və telefon nömrəniz ilə) qalır ki, partnyor hesabatını apara və mübahisəli halları yoxlaya bilsin. Partnyorlar məkanınızı, koordinatlarınızı, e-poçtunuzu, sevimlilərinizi və digər filiallardakı fəaliyyətinizi görmür.
Digər istifadəçilər
Filiallar haqqında yazdığınız şərhlər digər istifadəçilərə adınız və profil şəkliniz ilə birlikdə görünür. Şərhinizi istənilən vaxt silə bilərsiniz.
Partnyor əməkdaşlarının məlumatları
Partnyor hesabları üçün istifadəçi adı, parol (heş formasında), aid olduğu şirkət və filial saxlanılır; əməkdaşın tətbiq etdiyi hər endirim onun hesabı ilə qeydə alınır.
Məkan, kamera və digər icazələr
Məkan
- Məkan icazəsi istəyə bağlıdır. Tətbiq ondan yaxınlıqdakı filialları və endirimləri xəritədə və «Radar»da göstərmək, nəticələri məsafəyə görə süzmək üçün istifadə edir.
- İcazə verdikdə cihazınızın koordinatları yaxınlıqdakı filialları tapmaq üçün serverə göndərilir. Bundan əlavə, son məlum məkanınız profilinizdə saxlanılır: o, hər dəfə yenisi ilə əvəz olunur, məkan tarixçəsi aparılmır. Bu məlumat xəritəni mərkəzləşdirmək, sizə yaxın təklifləri göstərmək və ümumiləşdirilmiş xidmət statistikası üçün istifadə olunur; ona yalnız səlahiyyətli Brands’Box əməkdaşları baxa bilər.
- Endirimi özünüz təsdiqlədikdə tətbiq həmin anda cihazınızın koordinatlarını bir dəfə serverə göndərir. Server onları filialın ünvanı ilə müqayisə edir və bu təsdiq qeydində saxlayır — bu, filialda olduğunuzu yoxlamaq və sui-istifadəni araşdırmaq üçündür. Məkan icazəsi olmadan endirimi özünüz təsdiqləyə bilməzsiniz; bu halda QR kodunuzu satıcıya göstərə bilərsiniz.
- Android-də məkan yalnız tətbiq açıq olduqda istifadə olunur — arxa planda məkan icazəsi istənilmir.
- iOS-da «Radar xəbərdarlıqları»nı özünüz yandırsanız, tətbiq «Həmişə» icazəsini istəyir. Bu halda iOS aktiv endirimi olan ən yaxın filialların ətrafındakı (təxminən 300 m) zonaları izləyir; zonaya daxil olduqda tətbiq serverə yalnız həmin filialın identifikatorunu göndərir, koordinatlarınızı yox. Server sizə push bildiriş göndərir və bu bildiriş tarixçənizdə qalır. Radar xəbərdarlıqlarını istənilən vaxt söndürə bilərsiniz.
- Marşrut qurduqda filialın ünvanı seçdiyiniz xəritə tətbiqində (Apple Xəritələr, Google Maps, Waze) açılır; bundan sonra həmin tətbiqin gizlilik siyasəti tətbiq olunur.
Kamera və fotolar
- Kamera partnyor əməkdaşlarına müştərinin QR kodunu skan etmək, müştərilərə kassadakı Brands’Box QR kodunu skan edib endirimi özləri təsdiqləmək, istənilən istifadəçiyə isə profil şəkli çəkmək üçün lazımdır. QR kod cihazda tanınır; kamera görüntüsü serverlərimizə göndərilmir.
- Qalereyaya giriş yalnız profil şəklini (partnyorlar üçün — filial, şirkət və tədbir şəkillərini) seçmək üçündür. Serverə yalnız seçdiyiniz şəkil yüklənir; yükləmədən əvvəl o, kəsilir və sıxılır.
Bildirişlər və biometrik giriş
- Bildiriş icazəsi push bildirişləri almaq üçün istənilir və istəyə bağlıdır.
- Face ID, Touch ID və barmaq izi cihazın öz sistemi ilə yoxlanılır; biometrik məlumatlarınız bizə əlçatan deyil.
Bütün icazələri istənilən vaxt cihazınızın ayarlarında dəyişə bilərsiniz.
Cihazda saxlanılan məlumatlar
Giriş tokeni cihazın təhlükəsiz yaddaşında (iOS Keychain / Android Keystore), dil, mövzu, son axtarışlar və Radar ayarları isə tətbiqin yerli yaddaşında saxlanılır. Son axtarışların siyahısı serverə göndərilmir (axtarış sorğusunun özü nəticə almaq üçün göndərilir). Android-də tətbiq filial linki ilə quraşdırılıbsa, Google Play quraşdırma mənbəyi (Install Referrer) yalnız həmin filialı açmaq üçün cihazda oxunur və serverə göndərilmir.
Push bildirişlər, SMS və e-poçt
- Xidməti mesajlar — təsdiq kodları, abunəliyin aktivləşdirilməsi, yenilənməsi, dayandırılması və ödənişlə bağlı xəbərdarlıqlar, endirim və promo-kodlar. Bunlar xidmətin işləməsi üçün zəruridir və bildiriş ayarlarından asılı olmayaraq göndərilir.
- Məlumatlandırıcı bildirişlər — yeni endirimlər, xüsusi təkliflər və tədbirlər haqqında. Onları Profil → Bildiriş ayarları bölməsində tamamilə söndürə, kanalları (push, SMS, e-poçt), mövzuları və bildiriş dilini seçə bilərsiniz.
- Push bildirişlər Google Firebase Cloud Messaging (iOS-da Apple Push Notification Service ilə) vasitəsilə çatdırılır. Cihazın push tokeni hesabdan çıxdıqda silinir; push-u cihaz ayarlarından da söndürə bilərsiniz.
- SMS-lər mobil operatorun SMS şlüzü ilə göndərilir. 2222 xidmətində abunəliyin avtomatik yenilənməsini 2222-yə STOP (və ya DAYAN) mətnli SMS göndərməklə və ya *224*2# yığmaqla dayandırmaq olar.
- E-poçt bildirişləri öz poçt serverimizdən göndərilir və yalnız e-poçt kanalını seçdiyiniz halda gəlir.
Məlumatların saxlanma müddəti
Məlumatları yalnız toplandıqları məqsədlər üçün lazım olan müddətdə saxlayırıq:
- Hesab və profil məlumatları — hesabınız aktiv olduğu müddətdə.
- Təsdiq kodları 5 dəqiqə, SMS ilə alınan 4 rəqəmli endirim kodları 24 saat etibarlıdır. Endirimi özünüz təsdiqlədikdə ekranda görünən təsdiq kartı bir neçə dəqiqə etibarlıdır.
- Push tokeni — hesabdan çıxanadək və ya token etibarsız olanadək.
- Abunəlik, ödəniş və endirim əməliyyatlarının qeydləri — mühasibat uçotu, vergi və mübahisələrin həlli üçün qanunvericiliyin tələb etdiyi müddətdə, o cümlədən hesab silindikdən sonra.
- Texniki jurnallar (IP ünvanı, sorğular, SMS və bildiriş jurnalları) — təhlükəsizlik və xətaların araşdırılması üçün 12 aya qədər.
- Özünü təsdiq cəhdlərinin qeydləri (koordinatlar daxil olmaqla) — sui-istifadənin araşdırılması üçün 12 aya qədər; uğurlu təsdiqlər nəticəsində yaranan endirim əməliyyatları isə yuxarıdakı əməliyyat qeydləri kimi saxlanılır.
- Silinmiş hesablar — növbəti bölmədə göstərilən qaydada.
Müddət bitdikdən sonra məlumatlar silinir və ya şəxsiyyəti müəyyən etməyə imkan verməyən formaya (anonim statistikaya) salınır.
Hesabın və məlumatların silinməsi
Tətbiqdə
- Tətbiqdə Profil → Təhlükəsizlik → Hesabı sil bölməsini açın.
- Telefon nömrəniz qeyd olunubsa, ona göndərilən SMS kodu ilə silinməni təsdiqləyin.
- Hesab dərhal bağlanır: daxil olmaq mümkün olmur, push tokenləri, Google/Apple giriş bağlantıları və abunəlik ləğv edilir, yeni ödəniş tutulmur.
Tətbiqə girişiniz yoxdursa
support@brandsbox.az ünvanına hesabınıza bağlı telefon nömrəsini göstərərək yazın və ya +994 12 505 48 38 nömrəsinə zəng edin. Kimliyinizi təsdiqləmək üçün həmin nömrəyə kod göndərə bilərik. Sorğunu 30 gün ərzində icra edirik.
Yalnız 2222 SMS xidmətinə abunə olmusunuzsa, abunəliyi 2222-yə STOP mətnli SMS ilə və ya *224*2# ilə dayandıra, hesabınızın və məlumatlarınızın silinməsini isə yuxarıdakı vasitələrlə tələb edə bilərsiniz.
Nə silinir və nə saxlanılır
Hesab silindikdən sonra profiliniz (ad, telefon, e-poçt, cins, şəkil, məkan), sevimliləriniz, qiymətləndirmə və şərhləriniz, bildiriş ayarlarınız və cihaz məlumatlarınız 30 gün ərzində silinir və ya anonimləşdirilir. Ödəniş və endirim əməliyyatlarının qeydləri qanunvericiliyin tələb etdiyi müddətdə, texniki jurnallar və özünü təsdiq cəhdlərinin qeydləri isə «Saxlanma müddəti» bölməsində göstərilən müddətədək saxlanıla bilər — onlar xidmət göstərmək üçün istifadə olunmur.
Hesabın silinməsi geri qaytarıla bilməz.
Məlumatların təhlükəsizliyi
- Tətbiq və sayt serverlərimizlə yalnız şifrələnmiş HTTPS (TLS) bağlantısı ilə əlaqə saxlayır.
- Giriş tokeni cihazın təhlükəsiz yaddaşında saxlanılır; parollar yalnız heş formasında saxlanılır.
- SMS kodlarının göndərilməsi və yoxlanılması limitlərlə qorunur; tətbiq sorğuları avtomatlaşdırılmış sui-istifadəyə qarşı rəqəmsal imza ilə təsdiqlənir.
- Məlumatlara giriş yalnız vəzifəsi üçün buna ehtiyacı olan səlahiyyətli əməkdaşlara rollar əsasında verilir.
Heç bir ötürmə və saxlama üsulu tam təhlükəsiz deyil, lakin məlumatlarınızı qorumaq üçün ağlabatan texniki və təşkilati tədbirlər görürük. Məlumatların sızması baş verərsə, qanunvericiliyin tələb etdiyi hallarda sizi və müvafiq orqanları məlumatlandıracağıq.
Sizin hüquqlarınız
Qanunvericiliyə uyğun olaraq aşağıdakı hüquqlara maliksiniz:
- emal olunan məlumatlarınız, onların mənbəyi, məqsədi və alıcıları barədə məlumat almaq;
- məlumatlarınızın surətini almaq;
- yanlış və ya köhnəlmiş məlumatların düzəldilməsini tələb etmək (ad, cins, e-poçt və telefonu tətbiqdə özünüz dəyişə bilərsiniz);
- məlumatlarınızın silinməsini və ya emalının məhdudlaşdırılmasını (bloklanmasını) tələb etmək;
- razılığınızı geri götürmək və məlumatlandırıcı bildirişlərdən imtina etmək;
- hüquqlarınız pozulduqda səlahiyyətli dövlət orqanına və ya məhkəməyə müraciət etmək.
Bu hüquqlardan istifadə etmək üçün «Bizimlə əlaqə» bölməsindəki vasitələrlə müraciət edin. Müraciəti qanunvericiliklə müəyyən edilmiş müddətdə cavablandırırıq və kimliyinizi təsdiqləmək üçün əlavə məlumat istəyə bilərik.
Uşaqların məxfiliyi
Brands’Box 13 yaşından kiçik uşaqlar üçün nəzərdə tutulmayıb və biz bilərəkdən 13 yaşından kiçik uşaqların fərdi məlumatlarını toplamırıq. Belə məlumatların bizə təqdim edildiyini düşünürsünüzsə, support@brandsbox.az ünvanına yazın — onları siləcəyik.
Siyasətə dəyişikliklər
Bu siyasəti xidmətdəki və ya qanunvericilikdəki dəyişikliklərə uyğun olaraq yeniləyə bilərik. Yenilənmiş versiya bu səhifədə yeni qüvvəyə minmə tarixi ilə dərc olunur. Əhəmiyyətli dəyişikliklər barədə tətbiqdə və ya bildiriş vasitəsilə əvvəlcədən məlumat veririk.
Siyasət Azərbaycan, ingilis və rus dillərində dərc olunur; mətnlər arasında fərq olduqda Azərbaycan dilindəki mətn əsas götürülür.
Qüvvəyə minmə tarixi: 7 noyabr 2026.
Bizimlə əlaqə
Məlumat sahibi: SMILE MMC (Brands’Box), Azərbaycan Respublikası.
- E-poçt: support@brandsbox.az
- Telefon: +994 12 505 48 38
- WhatsApp: +994 50 548 03 43
- Ünvan: Bakı şəhəri, Səbail rayonu, M.Əfəndiyev küçəsi 2
- İş saatları: bazar ertəsi – cümə, 09:00–18:00
- Sayt: brandsbox.az
Tətbiqdəki «Əlaqə» bölməsindən də bizə yaza bilərsiniz.
Brands’Box tətbiqi
Profilinizi, bildiriş ayarlarınızı və hesabınızın silinməsini tətbiqdə idarə edə bilərsiniz. Suallarınız üçün: support@brandsbox.az.